Imvo n'Imvano ku ihagarikwa ry’ibikorwa by'urwego IRMCT byo gushakisha abaregwa jenoside yo mu Rwanda

Mu cyumweru gishize, kw'itariki ya 15 z'uku kwezi, umushinjacyaha mukuru wa IRMCT ( International Residual Mechanism for Criminal Tribunals') urwego rwasigariyeho urukiko mpuzamahanga rwa Arusha rwari rwarashyiriweeho kuburanisha abaregwa jenoside yakozwe mu Rwanda mu 1994 n'urwari rwarashyiriweho icyahoze ari Yougoslavia , Serge Brammertz yavuze ko ibikorwa byo gushakisha abaregwa jenoside yakozwe mu Rwanda bashakishwaga n'urwo rukiko bihagaritswe.

Brammertz yavuze ko ibyo bihagaritswe n'uko abantu babiri bari basigaye bashakisha, Charles Sikubwabo na Ryandikayo byemejwe ko bapfuye mu 1998. Akanama k'umuryango w'abibumbye gashinzwe umutekano kashyizeho urwo rukiko ICTR ( International Criminal Tribunal for Rwanda ) mu 1995 kugirango rukurikirane abaregwa ibyaha bya jenoside n'ibyaha byakorewe inyokomuntu mu Rwanda no mu bihugu bituranye, ibyaha byakozwe kuva kw'itariki ya 1 z'ukwa 1 mu 1994 kugeza kw'itariki ya 31 z'ukwa 12 mu 1994.

Urwo rukiko rwashyizwe i Arusha muri Tanzania. Kuva rutangiye mu 1995, rwashoboye gusohora inyandiko zo gufata abantu 93. Abarunenga bavuga ko rutakoze akazi gahagije ugereranije n'inkinko za gacaca mu Rwanda zakurikiranye abarenga miliyoni imwe n'ibihumbi 200.

Serge Brammertz kandi atangaje ibyo mu gihe urukiko rw'i La Haye rwatangaje ko Félicien Kabuga wafatiwe mu Bufaransa mu 2020, adashobora kuburanishwa kubera uburwayi ( bwo kwibagirwa ), na Fulgence Kayishema wafatiwe muri Afrika y’Epfo umwaka ushize atarashyikirizwa uru rwego rukorera Arusha muri Tanzania.

Mu kwezi gutaha Serge Brammertz azatanga icyegeranyo mu kanama ka ONU gashinzwe umutekano kugirango kongerere ikiringo cy'imyaka 2 gaha uru rwego rw'ubushinjacyaha.

Imvo n'Imvano yashatse kumenya icyo bivuze guhagarika ishakishwa mu gihe leta y'u Rwanda yo ivuga ko yatanze impapuro zo gufata abashakishwa bari mu bihugu bitandukanye barenga 1100.

Ese ubwo ibikorwa byo gushakisha bihagaze, hasigaye gukorwa iki ?

Ngibyo ibyo mugiye kumva muri iki kiganiro mwateguriwe kandi mugezwaho na Félin Gakwaya