Burundi: Imvo n'Imvano ku mwaka leta ya Perezida Evariste Ndayishimiye imaze ku butegetsi (igice cya kabiri)

Nongeye kubaramukanya amahoro mwese muteze amatwi Imvo n'Imvano yo kuri uyu wa gatandatu tariki 17 z'ukwa 7 mu 2021.

Uyu munsi turabagezaho igice cya kabiri cy'ikiganiro twabagejejeho ku wa gatandatu ushize, ikiganiro cyavugaga ku mikorere ya leta ya Perezida Evariste Ndayishimiye yujuje umwaka iri ku butegetsi mu Burundi.

Evariste Ndayishimiye n'abo bari kumwe mu butegetsi guhera ku itariki ya 18 y'ukwezi kwa gatandatu 2020, bise leta yabo LETA MVYEYI-LETA NKOZI. Twarebaga icyo iyo leta imaze kugeraho nyuma y'umwaka umwe imaze ku butegetsi. N'imbogamizi yahuye nazo.

Muri iki gice cya kabiri turanumva icyo leta ya Evaristse Ndayishimiye ivuga ku banenga imikorere yayo mu rwego rwo kubahiriza uburenganzira bw'ikiremwamuntu no kuzahura ubukungu.

Imvo n'Imvano kandi yahaye ijambo abatavuga rumwe n'ubutegetsi bari mu gihugu cy'u Burundi. Bavuga uko babona ibyivugo bya LETA MVYEYI-LETA NKOZI muri uyu mwaka imaze ku butegetsi.

Abatumire bacu bari Willy Nyamitwe, ukuriye urwego rw'itangazamakuru mu biro by'umukuru w'igihugu, Therence Manirambona, umuvugizi w'ishyaka CNL ritavuga rumwe n'ubutegetsi, hamwe kandi na Faustin Ndikumana, umukuru w'ishyirahamwe PARCEM - ishyirahamwe ryihaye intego yo guhindura ibitekerezo n'imyitwarire bibangamira kugera ku mahoro n'iterambere rirambye mu Burundi.

Iryo shyirahamwe ryari ryarafatiwe ibihano byo guhagarika ibikorwa byaryo mu Burundi na leta yari iriho icyo gihe rizira ngo ibikorwa byo guharabika isura y'igihugu n'abayobozi bacyo.

Ikiganiro mwagiteguriwe kandi murakigezwaho na Félin Gakwaya.