Rwanda: Imvo n'Imvano na Épimaque Nyagashotsi warwaniye UK mu ntambara ya kabiri y'isi

Ndabashuhuje mwebwe mwese nshuti muteze amatwi BBC, uyu ni umwanya w'ikiganiro Imvo n'Imvano. None ni ku wa gatandatu tariki ya 8 y'ukwezi kwa 5 umwaka 2021.

Imvo n'Imvano y'uyu munsi turaganira n'umusaza Nyagashotsi Épimaque, utuye mu murenge wa Kiziguro mu karere ka Gatsibo, ni mu ntara y'uburasirazuba bw'u Rwanda.

Ku myaka ye 101, Épimaque Nyagashotsi afite amateka yihariye yo kuba yararwanye intambara ya kabiri y'isi mu ngabo z'Abongereza zarwaniraga mu gihugu cya Kenya.

Mu kiganiro cyacu murumva uburyo we n'abandi bari kumwe kuri urwo rugamba bakiriwe ubwo bari bagarutse mu Rwanda, bashoje urwo rugamba.

Nyagashotsi avuga ko muri urwo rugamba yari mu basirikare bari bayobowe na Idi Amin Dada.

Wari uzi se ko urugamba rw'Abongereza rurangiye nyuma y'igihe aba bombi baje kongera guhura, umwe ari Perezida wa Uganda undi ari impunzi? Ibyo byose urabyumva muri iki kiganiro.

Nyagashotsi kandi avuga ko yari mu mutwe w'abiswe 'Inyenzi' bagabye ibitero-shuma (guerilla) ku Rwanda baturutse mu buhungiro mu gihugu cya Uganda mu myaka ya za 60, nyuma gato yo guhunga u Rwanda bitewe n'imvururu n'ubwicanyi byibasiye Abatutsi.

Gusa, ngo umudari yambitswe n'Abongereza nyuma y'urugamba ndetse n'amafoto amugaragaza muri ibyo bihe, nta na kimwe yibitseho. Avuga ko byatikiriye muri izo mvururu zatumye ahunga igihugu.

Arasaba Abongereza kumuha ubufasha bwo kumutunga mu zabukuru (pension) nk'umuntu wabarwaniye mu ntambara ya kabiri y'isi.

Ni ikiganiro mwateguriwe kandi mugiye kugezwaho na Yves Bucyana.