Imvo n'Imvano: Africa ihagaze ite mu rugamba rwo guhangana Covid-19?

Mwaramukanye amahoro abakunzi b'ikiganiro cy'Imvo n'Imvano cyo kuri uyu wa gatandatu itariki ya kabiri y'ukwezi kwa gatanu. Mu iki kiganiro turareba ukuntu umugabane w'Afurika uhagaze mu rugamba rwo guhangana n'icyorezo cy'indwara ya Covid-19 iterwa n'agakoko gashya ka Corona.

Ku isi yose abantu bazwi bamaze kuyandura bararenga miliyoni eshatu, mu gihe abazwi imaze guhitana barenga ibihumbi 200. Muri rusange umugabane w'Afurika nta barwayi benshi b'iyi ndwara ufite ugereranyije no muri Amerika, Uburayi n'Aziya.

Afurika rero imaze kubonekamo abarwayi barenga ibihumbi 30 mu gihe abo imaze guhitana kuri uyu mugabane barenga 1400. Abenshi mu bamaze gupfa baraboneka mu bihugu byo mu majyaruguru y' Afurika naho igihugu gifite abarwayi benshi kurusha ibindi ni Afurika y'epfo.

Hagati aho ariko ishami rya ONU rishinzwe ubuzima ku isi (OMS/WHO) riherutse gutanga impuruza ko Afurika ishobora kuba ari yo igiye kuba indiri y'iyi ndwara. ONU ikavuga ko bishoboka ko iki cyorezo cy'indwara ya coronavirus gishobora guhitana abantu batari munsi y'ibihumbi magana atatu ku mugabane w'Afurika kandi kigatuma abantu hafi miliyoni 30 binjira mu bukene budasanzwe.

Muri iki kiganiro turaganira ku cyakorwa kugira ngo Afurika bitayibaho turebe n'ukuntu ihanganye na kino cyorezo muri kino gihe. Turanareba kandi n'aho ubushakashatsi bugeze mu kugerageza kubonera umuti cyangwa urukingo iyi ndwara.

Abatumire bacu ni Dr Olivier Manzi, umwarimu muri Kaminuza y'u Rwanda akaba n'umushakashatsi ku ndwara z'ibyorezo akaba na 'consultant' cyangwa se impuguke muri OMS/WHO, Profeseri Gasana Janvier, umwarimu mu ishami ry'ubuvuzi muri Kaminuza yo mu gihugu cya Kuwait, na Dr Jean de Dieu Bigirwanayo, umuganga mu gihugu cy'Afurika y'epfo.

Iki kiganiro mwagiteguriwe kandi murakigezwaho na Jacques Niyitegeka.