Sudani y'Epfo ivuga ko yongereye ibikorwa byo gupima Ebola ku mupaka na Kongo

Umutegetsi wo muri minisiteri y'ubuzima muri Sudani y'Epfo avuga ko iki gihugu cyongereye ibikorwa byo gupima indwara ya Ebola ku mupaka gihana na Repubulika ya Demokarasi ya Kongo.

Ni nyuma yaho muri iki cyumweru umuntu asanganwe iyo ndwara muri Kongo kuri kilometero 70 uvuye muri Sudani y'Epfo.

Dr Richard Lino Laku yabwiye Radio Miraya yo muri Sudani y'Epfo ko iki gihugu cyohereje muri leta ya Yei River itsinda rivuye mu murwa mukuru Juba ryo gufasha abasanzwe bakora mu rwego rw'ubuzima muri ako karere.

Yongeyeho ko bakomeje kugenzura niba haba hari abaturage banyuze "mu nzira zitemewe n'amategeko" binjira muri Sudani y'Epfo bavuye muri Kongo, aho abantu barenga 2300 bamaze kwandura Ebola mu mezi 11 ashize.

Amakuru avuga ko uwo muntu wasanganywe Ebola ari kuri kilometero 70 uvuye ku mupaka wa Sudani y'Epfo ari umugore w'imyaka 40 y'amavuko wakoze urugendo rwa kilometero 500 ava i Beni mu ntara ya Kivu y'amajyaruguru.

Ishami ry'umuryango w'abibumbye ryita ku buzima (OMS) rivuga ko iyi Ebola yo muri Kongo - ihadutse ku nshuro ya 10 - imaze guhitana abarenga 1500.

OMS ivuga ko "mu gihugu no mu karere ibyago byo kuyandura bikiri hejuru cyane", ariko iyi Ebola ntabwo iritwa ikibazo giteje akaga amahanga.

Mu kwezi gushize kwa gatandatu, muri Uganda abantu babiri bari baherutse kujya muri Kongo bapfuye bazize Ebola, ariko kuva icyo gihe nta bandi bantu baratangazwa ko banduye Ebola bo hanze ya Kongo.