Isabel Dos Santos: Ubushinjacyaha bwa Angola buvuga ko bugiye kumugarura mu gihugu

Umushinjacyaha mukuru wa Angola yijeje ko azakoresha ubushobozi "bwose bushoboka" kugira ngo agarure Isabel Dos Santos mu gihugu nyuma y'impapuro z'ibanga zatangajwe zerekana uko yanyereje umutungo wa leta mu gihe se yari perezida.

Madamu Dos Santos yatangaje ko ibivugwa kuri we muri izi nyandiko byose ari ibinyoma kandi ari ibintu bishingiye kuri politiki bikorwa na leta igamuje kumuhiga.

Umushinjacyaha mukuru wa Angola Helder Pitra Gros yabwiye radio y'igihugu ati:

"Tuzakoresha ubushobozi bwose n'uburyo mpuzamahanga buriho kugira ngo tugarure Isabel Dos Santos mu gihugu... Twasabye ubufasha bw'ibindi bihugu bya Portugal, Dubai n'ibindi"

Madamu Dos Santos n'ubundi yariho akorwaho iperereza n'abategetsi muri Angola ku birego bya ruswa, mu gihe kandi umutungo we muri Angola wafatiriwe na leta.

BBC Panorama n'abandi banyamakuru bageze ku nyandiko zirenga 700,000 zari ibanga zivuga ku buryo uyu mugore yubatse ubutunzi bwe, ni inyandiko ubu ziri kwitwa 'Luanda leaks'.

Ikinyamakuru Forbes kivuga ko Madamu Dos Santos ariwe mugore ukize kurusha abandi bose muri Africa, umutungo we ubarirwa kuri miliyari $2.