ቀጥታ, አሜሪካ የኃይል ተቋማቷን ካጠቃች ሁቲዎች የቀይ ባሕር የነዳጅ መተላለፊያን ለመዝጋት እንዲዘጋጁ ኢራን ማሳሰቧ ተዘገበ

የቀጥታ ሽፋን

1. ከ 1 ሰአት በፊትየየመን ሁቲዎች የሳዑዲ አረቢያን የነዳጅ ማምረቻ ተቋማት እንደሚያጠቁ አስጠነቀቁ

   ሁቲዎች ከሳዑዲ አረቢያ ጋር የሚያካሂዱት ግጭት የሚባባስ ከሆነ የሳዑዲን የነዳጅ ተቋማት እና ሌሎች ወሳኝ ተቋማት ዒላማ እንደሚያደርጉ አስጠነቀቁ።

   የሁቲ ታጣቂ ቡድን መሪ የሆነው አብዱል-ማሊክ ሁቲ እንደተናገረው "ሳዑዲ አረቢያ በአገራችን ላይ መጠነ ሰፊ ጥቃት በመክፈት ግጭቱን የምታባብስ ከሆነ፣ ሁሉም የነዳጅ ማምረቻ ተቋማቷ እና ወሳኝ ማዕከላቷ የሚሳዔሎቻችን እና የድሮኖቻችን ዒላማ ይሆናሉ” በማለት አስጠንቅቋል።

   ሰኞ ዕለት ሳዑዲ በሰነዓ አውሮፕላን ማረፊያ ላይ ጥቃት ፈጽማለች በማለት ሁቲዎች የከሰሱ ሲሆን በምላሹም በሳዑዲ ውስጥ የሚገኝን ዒላማ ማድረጋቸውን አሳውቀዋል። በሁለቱ ወገኖች መካከል አሁን እየተካሄደ ያለው የተኩስ ልውውጥ በአውሮፓውያኑ 2022 ከተደረሰው ተኩስ አቁም ወዲህ በመካከላቸው ያለው ውጥረት መባባሱን ያሳያል።

   ሳዑዲ ተጨማሪ ጥቃት በሰነዓ ላይ የምትፈጽም ከሆነ ሪያድ የሚገኘው አውሮፕላን ማረፊያዋ ዒላማ እንደሚሆን የሁቲ ታጣቂ ቡድን መሪ ማስጠንቀቁን ኤኤፍፒ የዜና ወኪል ዘግቧል።

   በሳዑዲ የሚደገፈው እና ኤደን ከተማ ውስጥ መቀመጫውን ያደረገው የየመን መንግሥት በሰነዓ ላይ የተፈጸመው ጥቃት የሁቲዎች አጋር የሆነችው የኢራን አውሮፕላን እንዳያርፍ ለማድረግ ነው ብሏል።

   ወደ የመን የአየር ክልል የሚገቡ አውሮፕላኖች የቅድሚያ ፈቃድ በሳዑዲ ከሚመራው የአካባቢው አገራት ጥምረት ማግኘት እንዳለበት የሚያስገድደው አሠራር ከአስር ዓመታት በላይ በሥራ ላይ ቆይቷል።

   የየመን መንግሥት እና ደጋፊዎቹ እንደሚሉት ይህንን የበረራ ፍቃድ ሁቲዎች እና ኢራን ከግዛቷ ቀጥታ በረራ በማድረግ ጥሰት እየፈጸሙ ናቸው ሲሉ ይከስሳሉ።

   ማክሰኞ ዕለት ሁቲዎች በሳዑዲ የሚመራው ጥምረት ያሰማራው የቅኝት ድሮንን መትተው መታላቸውን አሳውቀዋል።

2. ከ 4 ሰአት በፊትአሜሪካ የኃይል ተቋማቷን ካጠቃች ሁቲዎች የቀይ ባሕር የነዳጅ መተላለፊያን ለመዝጋት እንዲዘጋጁ ኢራን ማሳሰቧ ተዘገበ

   አሜሪካ የኢራን የኃይል ማመንጫ መሠረተ ልማቶች ላይ ጥቃት የምትሰነዝር ከሆነ፤ የየመን ሁቲ አማጺያን በቀይ ባሕር የሚገኙ የነዳጅ መተላለፊያን ለመዝጋት እንዲዘጋጁ ቴህራን ማሳሰቧን ሮይተርስ የዜና ወኪል ዘገበ።

   የኢራን አመራሮች በጉዳዩ ላይ እንደተወያዩ እና በየመን አጋሮቻቸው ለሆኑት ሁቲዎች መልዕክቱ እንደተላለፈ ለጉዳዩ ቅርበት ያላቸው ሁለት ከፍተኛ የቴህራን ባለሥልጣናት ተናግረዋል።

   የሮይተርስ ዘገባ እንደሚጠቁመው ጉዳዩ ስሱ ከመሆኑ የተነሳ ባለሥልጣናቱ ማንነታቸው እንዲገለጽ አልፈቀዱም።

   ከዚህ ቀደም ስለ ጉዳዩ ምንም ያልተሰማ ሲሆን የሁቲ አማጺያንም በቅርቡ መልዕክቱ እንደደረሳቸው ተጠቁሟል።

   መልዕክቱ በምን መንገድ እንደተላለፈ እንዲሁም መልዕክቱ የተላለፈው ማክሰኞ ፕሬዝዳንት ዶናልድ ትራምፕ የኢራንን የኃይል አቅርቦች መሠረተ ልማቶች ለመምታት ከዛቱ በኋላ ስለመሆኑ የሮይተርስ ምንጮች ማብራሪያ አልሰጡም።

   የኢራን የውጭ ጉዳይ ሚኒስቴር እና የሁቲ ቃል አቀባይ በጉዳዩ ላይ ከሮይተርስ አስተያየት እንዲሰጡ ለቀረበላቸው ጥያቄ ምላሽ አልሰጡም።

3. ከ 5 ሰአት በፊትበአልጄሪያ በሕጻናት ማሳደጊያ ላይ በተነሳ እሳት ቢያንስ 11 ሰዎች ሞቱ

   በሰሜን አፍሪካዊቷ አገር አልጄሪያ ውስጥ በሚገኝ ወላጆቻቸውን ያጡ ማሳደጊያ ላይ በተከሰተ የእሳት አደጋ ቢያንስ 11 ሰዎች ሕይወታቸው ሲያልፍ ሌሎች 19 ደግሞ ጉዳት ደረሰባቸው።

   በዋና ከተማዋ አልጀርስ ዳርቻ ላይ በምትገኘው ሚሐመድያ ተብላ በምትጠራ አካባቢ ባለው የእጓለሙታን ማዕከል ውስጥ የተነሳውን እሳት ለመቆጣጠር የእሳት አደጋ እና የአደጋ ጊዜ ሠራተኞች ጥረት እያደረጉ መሆናቸው ተዘግቧል።

   ባለ ሁለት ፎቅ በሆነው ሕንጻ ላይ ረቡዕ ሌሊት በተከሰተው የእሳት ቃጠሎ ጉዳት የደረሰባቸው ሕጻናት ማንነት እና ዕድሜ ይፋ አልተደረገም።

   በማሳደጊያው ውስጥ የነበሩ የአካል ጉዳት የነበረባቸው አምስት ሕጻናትን ማትረፍ መቻሉን የአደጋ ጊዜ ሠራተኞች የገለጹ ሲሆን፣ የእሳቱ ምክንያት ምን እንደሆነ አልታወቀም።

   አደጋውን ተከትሎ የአገሪቱ ጠቅላይ ሚኒስትር ሲፊ ጋሪብ ጉዳት የደረሰባቸውን ሆስፒታል ተገኝተው ጎብኝተዋል።

   በአልጄሪያ በአሁኑ ጊዜ ከፍተኛ ሙቀት የተከሰተ ሲሆን በአገሪቱ ሰሜናዊ ክፍል ውስጥ በርካታ ሰደድ እሳቶች እንዲከሰቱ ምክንያት ሆኗል።

4. ከ 6 ሰአት በፊትየአርጀንቲናውያን የዓለም ዋንጫ ፖለቲካዊ መልዕክት እና የሚጠበቀው የፊፋ ቅጣት

   አርጀንቲና ተጫዋቾቿ የእንግሊዝን ብሔራዊ ቡድንን በዓለም ዋንጫ የግማሽ ፍፃሜ ጨዋታ ካሸነፉ በኋላ፤ አገራቸው በፎክላንድ ደሴቶች ላይ ያላትን የይገባኛል ጥያቄ የሚደግፍ ጽሁፍ አሳይተዋል። ይህ ድርጊታቸው ከፊፋ የሥነ ምግባር ጥሰት ቅጣት እንደሚያስወስድ እየተጠበቀ ነው።

   የአርጀንቲና ቡድን አትላንታ ውስጥ በተካሄደው ጨዋታ እንግሊዝን 2 ለ 1 በሆነ ውጤት ያሸነፈ ሲሆን እሁድ በሚደረገው የፍፃሜ ጨዋታ ከስፔን ጋር ይገጥማል።

   የጨዋታው የመጨረሻ ፊሽካ ከተሰማ በኋላ የአርጀንቲና ተጫዋቾች 'ላስ ማልቪናስ' በሚል በማለት የሚጠሯቸው ደሴቶች የአገራቸው ግዛት መሆናቸውን የሚገልጽ ባነር ይዘው ታይተዋል።

   ደስታቸውን ሲገልጹ የያዙት ባነር "ፎልክላንድ ደሴቶች የአርጀንቲና ናቸው" የሚል ነው።

   የፎልክላንድ ደሴቶች፣ በደቡብ ምዕራብ አትላንቲክ ውቅያኖስ ላይ የሚገኙ የእንግሊዝ የባሕር ማዶ ግዛት አካል ሲሆኑ፣ በብሪታንያ እና በአርጀንቲና መካከል የሉዓላዊነት ይገባኛል ውዝግብ ርዕሰ ጉዳይ ሆነው ቀጥለዋል።

   ሁለቱ አገራት ከአውሮፓውያኑ ሚያዝያ እስከ ሰኔ 1982 ድረስ በአርጀንቲና ምሥራቃዊ የባሕር ዳርቻ 300 ማይል ርቀት በሚገኙት ደሴቶች ላይ ጦርነት አካሂደው ነበር።

   ለ74 ቀናት በዘለቀው ጦርነት 655 የአርጀንቲና ወታደሮች እና 255 የእንግሊዝ ወታደሮችን ሲሞቱ ከደሴቶቹ የመጡ ሦስት ሰዎችም በጦርነቱ ተገድለዋል።

   በአውሮፓውያኑ 2014 የአርጀንቲና ብሔራዊ ቡድን ከስሎቬንያ ጋር ባደረገው የወዳጅነት ጨዋታ ተጫዋቾቹ ተመሳሳይ መልዕክት የያዘ ባነር በማሳየታቸው ፊፋ በአገሪቱ እግር ኳስ ማኅበር ላይ የ20 ሺህ ፓውንድ ቅጣት ጥሎበት ነበር።

   የዓለም እግር ኳስ የበላይ አስተዳዳሪ አካል የሆነው ፊፋ ይህ የአርጀንቲና ቡድን ድርጊት የተቋሙን የሚጥስ ነው ስላለ፤ ክስተቱን መርምሮ ቅጣት እንደሚያስተላለፍ እየተጠበቀ ነው።

5. ከ 7 ሰአት በፊትኢራን በባሕረ ሰላጤው የሚገኙ የአሜሪካ ጦር ሰፈሮችን አጠቃች

   ኢራን በከፈተችው አዲስ ዙር ጥቃት በጎረቤቶቿ የባሕረ ሰላጤው አገራት ውስጥ የሚገኙ አሜሪካ የጦር ሠፈሮችን መታች።

   ዮርዳኖስ፣ ኩዌት እና ባሕሬንን ጨምሮ በቀጣናው የሚገኙ ዒላማዎች ጥቃት እንደተፈጸመቸባው ኢራን ገልጻለች። የኢራን ጦር ሌሊት ላይ በፈጸመው ጥቃት ዮርዳኖስ ውስጥ የሚገኙ የአሜሪካ ሠራዊት “የግንኙነት ሥርዓቶች እና የነዳጅ ማጠራቀሚያዎችን” መምታቱን እንዳስታወቀ ታስኒም የዜና ወኪል ዘግቧል።

   ዮርዳኖስ ውስጥ ዒላማ ከተደረጉት ስፍራዎች አንዱ ‘አል አዝራቅ’ ጦር ሠፈር እንደሆነ የገለጸው ጦሩ፤ ቦታው “ፀረ ሚሳዔል መከላከያ ሥርዓት የሚገኝበት” እንደሆነ ጠቅሷል።

   ኩዌት ውስጥ በሚገኘው አሊ ሳሌም የጦር ሠፈር ደግሞ “የቅድመ ማስጠንቂያ ራዳር ሥርዓት” ዒላማ መደረጉን የኢራን እስላማዊ አብዮታዊ ዘብ ገልጿል።

   አብዮታዊ ዘቡ እንደሚናገረው “የአሜሪካ ወታደሮች ኩዌት ውስጥ የሚሰበሰቡበት” ስፍራ ላይም ጥቃት ደርሷል። ጥቃቱ የተፈጸመው “ሚሳዔል እና ድሮን” በመጠቀም እንደሆነ አስታውቋል።

   በተመሳሳይ አሜሪካ ረቡዕ ሌሊት በመላው ኢራን በርካታ ስፍራዎች ላይ ጥቃት ፈጽማለች። ለስድስት ሰዓታት ቆየው ጥቃት ኢራን በሆርሙዝ ወሽመጥ “ንጹኃን ባሕርተኞችን ስጋት ላይ ለመጣል ያላትን አቅም ያዳከመ” እንደሆነ የአሜሪካ ጦር ገልጿል።

6. ከ 8 ሰአት በፊትአሜሪካ ለሳዑዲ አረቢያ እና ለኩዌት መሣሪያ እንዲሸጥ ፈቀደች

   የአሜሪካ የውጭ ጉዳይ መሥሪያ ቤት የሳዑዲ አረቢያን የአየር መከላከያ ሥርዓት ለማጠናከር የ1.96 ቢሊዮን ዶላር የጦር መሣሪያዎች ሽያጭ መፍቀዱን ገለጸ።

   ውሳኔው የተላለፈው በመካከለኛው ምሥራቅ ያለው ግጭት ተባብሶ በቀጠለበት ወቅት ነው።

   ሚኒስቴሩ ባወጣው መግለጫው የጦር መሣሪያ ሽያጩ፣ “የኔቶ አባል ያልሆነችውን ቁልፍ አጋር ፀጥታ በማጠናከር የአሜሪካን የውጭ ጉዳይ ፖሊሲ እና ብሔራዊ የደኅንነት ዓላማዎችን ይደግፋል" ብሏል።

   ሳዑዲ አረቢያ በፋርስ ባሕረ ሰላጤ ቀጣና ላለው ፖለቲካዊ እና ኢኮኖሚያዊ መረጋጋት ወሳኝ ሚና እንደምትጫወትም መግለጫው ጠቅሷል።

   መግለጫው ጨምሮም ለሳዑዲ አረቢያ የቀረበው ስምምነት፣ ለአየር በአየር እና ከአየር ወደ ምድር ለሚደረጉ ዘመቻዎች የሚውሉ ዘመናዊ የጦር መሣሪያ ሥርዓትን ጨምሮ ተኳሽ፣ ተተኳሽ እና ሌሎች መለዋወጫዎች ፣ ሥልጠና እና የሎጂስቲክ ድጋፍን ያካትታል።

   የውጭ ጉዳይ መሥሪያ ቤቱ ለኩዌት ለጦር አውሮፕላኖች ቴክኒካዊ ድጋፍ የሚውል የ484 ሚሊዮን ዶላር ድጋፍም አፅድቋል።

   ከኩዌት ጋር የተደረሰው የመሣሪያ ሽያጭ ስምምነት ቴክኒካዊ ድጋፍ እና ለሲ- 17 አውሮፕላን የሚውሉ መለዋወጫዎችን፣ የጥገና አገልግሎት፣ ሶፍትዌር፣ ሥልጠና እና ሎጂስቲክስ አገልግሎቶችን ያካትታል።

   የመሣሪያ ሽያጩ ምክር ቤቱ ከገመገመው በኋላ ተግባራዊ እንደሚሆንም መስሪያ ቤቱ ገልጿል።

7. 16 ሀምሌ 2026በናይጄሪያ ፕሬዚደንት ቢሮ ውስጥ የተከፈተው "ሐሰተኛ ተቋም" ኃላፊ በቁጥጥር ሥር ዋለ

   በናይጄሪያው ፕሬዚደንት ቢሮ ውስጥ እንደተቋቋመ የተገለፀው ሐሰተኛ ተቋም ኃላፊ ለሳምንታት ሲፈለግ ከቆየ በኋላ በቁጥጥር ሥር ዋለ።

   አዴኒይ አዴይሚ ማቲው የተባለው ግለሰብ 'ፕሬዚደንሻል ፌሪን ኢንቨስትመንት ፕሮሞሽን' በሚል ለመሰረተው ተቋም ዋና ዳይሬክተር እንደሆነ ይገልጻል።

   ፕሬዚደንቱ እና ቢሯቸው ግን ስለተቋሙም ሆነ ስለዳይሬክተሩ ሹመት የሚያውቁት ነገር እንደሌለ ተናግረዋል።

   ይህንንም ተከትሎ በ950 ሺህ ዶላር በተመሰረተው ሐሰተኛ ተቋም ላይ የሙስና ምርመራ እንዲደረግ አዝዘዋል።

   ግለሰቡ መጀመሪያ ላይ ጥፋተኛ አለመሆኑን ለአገሪቷ መገናኛ ብዙኃን የተናገረ ሲሆን የቀረበበትን ሐሰተኛ እና የማስመሰል ክሶች ቀርቦ በመከላከል ስሙን እንደሚያድስ ገልጾ ነበር።

   ሆኖም ይህንን ማድረግ ባለመቻሉ የፌደራል ከፍተኛ ፍርድ ቤት የእስር ማዘዣ አውጥቶበታል።

   ማቲው ለሳምንታት ተሰውሮ ከቆየ በኋላ በደቡብ ምዕራቧ ኦሱን ግዛት በቁጥጥር ሥር ውሏል።

   ጉዳዩ ፕሬዚደን ቦላ ቲኑቡ ባለፈው ሳምንት በማያውቁት ተቋም ላይ የሙስና ምርመራ እንዲደረግ ካዘዙ በኋላ በናይጄሪያ መነጋገሪያ ሆኗል።

   የፕሬዚደንቱ ቢሮ፣ የጽሕፈት ቤቱ ኃላፊ ፊርማ ያለበት እና ግለሰቡ ራሱን የሾመበት ደብዳቤ ሐሰተኛ መሆኑን አረጋግጧል።

   የፍርድ ቤቱ የክስ መዝገብ እንደሚያስረዳውም አደይሚ እና ሌሎች ሁለት ግለሰቦች ምክር ቤቱን ለማቋቋም ሐሰተኛ ሰነድ በማዘጋጀት፣ በርካታ የባንክ አካውንቶችን በተቋሙ ስም በመክፈት እና መሬት ላይ ለሌለ ተቋም ሕጋዊ እውቅና በመፈለግ ተከስሰዋል።

8. 16 ሀምሌ 2026ፕሬዝዳንት ትራምፕ ኢራን “ባህሪዋን እንድታስተካክል” ካስጠነቀቁ በኋላ የአሜሪካ ጦር አዲስ ጥቃት ከፈተ

   ፕሬዝዳንት ዶናልድ ትራምፕ ረቡዕ ዕለት ኢራን “ባህሪዋን እንድታስተካክል” ካስጠነቀቁ በኋላ፤ የአሜሪካ ጦር በአገሪቱ የተለያዩ ክፍሎች አዲስ ጥቃት ከፈተ።

   የአሜሪካ ጦር ባወጣው መግለጫ፤ በሆርሙዝ ወሽመጥ የሚያልፉ መርከቦች ጉዞን አደጋ ላይ ለመጣል ጥቅም ላይ የዋሉ "የኢራን ወታደራዊ አቅሞች" ዒላማ መደረጋቸውን አስታውቋል።

   ለ90 ደቂቃ በቆየው አዲስ ዙር ጥቃት በታላቁ ቱንብ ደሴት የሚገኙ የኢራን የባሕር ዳርቻ መከላከያዎች እንዲሁም የክሩዝ ሚሳዔል ማከማቻ እና ማስወንጨፊያ ጣቢያዎች መመታታቸውን ገልጿል።

   የአራን “የዕዝ ማዕከላት፣ የፀረ-አውሮፕላን መከላከያ ሥርዓቶች፣ የሚሳኤልና የድሮን አቅሞች እንዲሁም የባሕር ዳርቻ መከታተያ ተቋማት" ጥቃት ከደረሰባቸው የመከላከያ አቅም መካከል ተጠቅሰዋል። በሆርሙዝ ወሽመጥ ላይ የምትገኘው የባንደር አባስ ከተማም ዒላማ እንደሆነች ተነግሯል።

   እነደ ጦሩ ገለጻ፤ አሜሪካ ወደ ኢራን ወደቦች የሚደረግ ጉዞ ላይ የጣለችውን እግድ በመጣስ ለማለፍ የሞከረ አንድ መርከብ ላይ ተተኩሷል።

   ዋሽንግተን ይህንን ጥቃት ያደረሰችው ኢራን ባሕሬን እና ኩዌት ውስጥ ያሉትን ጨምሮ በቀጣናው የሚገኙ የአሜሪካ ወታደራዊ ዒላማዎችን መምታቷን ከገለፀች በኋላ ነው።

   ለአምስተኛ ቀን የቀጠለው አዲስ ዙር የጥቃት ምልልስ አገራቱ ጦርነቱን ለመቋጨት ገብተውት የነበረውን የመጀመሪያ ደረጃ ስምምነት አደጋ ላይ ጥሎታል።

   የኢራን ዋና ተደራዳሪ እና የፓርላማ አፈ ጉባኤ መሀማድ ባገር ጋሊባፍ አገራቸው ከስምምነቱ የማትጠቀም ከሆነ ለውሉ የምትገዛበት “ምንም ምክንያት” እንደሌላት ለመንግሥት መገናኛ ብዙኃን ተናግረዋል።

   ፕሬዝዳንት ትራምፕ ኢራን እስከሚቀጥለው ሳምንት ድረስ ወደ ንግግር የማትመለስ ከሆነ ድልድዮችን እና የኃይል ማመንጫዎችን እንደሚመቱ ማክሰኞ ዕለት ዝተው ነበር።

   ረቡዕ ዕለት ከጋዜጠኞች ጋር በነበራቸው ቆይታ፤ ይህንን ከማድረጋቸው በፊት ቀነ ገደብ ይሰጡ እንደሆነ ተጠይቀዋል። “ቀነ ገደብ ማስቀመጥ አልወድም፤ ነገር ግን እነሱ በደንብ ያውቃሉ፣ ታሪኩን ያውቁታል . . . ባህሪያቸውን ቢያስተካክሉ ይሻላቸዋል" ሲሉ ምላሽ ሰጥተዋል።

   በኋላ ላይ ደግሞ አሁን ኢራን "ደስተኛ አይደለችም" ሲሉ በመከላከያ ጉባኤ ላይ ለተገኙት ልዑካን ተናግረዋል።

   “ለመስማማት እጅጉን ይፈልጋሉ። እያደረግን ያለነውን ነገር አልወደዱትም” ብለዋል። “የምንፈልገው ከእነርሱ ጋር መስማማት ነው ወይስ የጀመርነውን እናጠናቅቅ የሚለውን እንመለከታለን” ሲሉም ተደምጠዋል።

   የኢራኑ ዋና ተደራዳሪ ጋሊባፍ በበኩላቸው፤ የአገራቸው ብሔራዊ ደኅንነት የተመሠረተው በሆርሙዝ ወሽመጥ ያለውን “የኢራን አሰራር” በማስቀጠል ላይ እንደሆነ ገልጸዋል።

   ከአሜሪካ ጋር “የኅልውና” ግጭት ውስጥ ያለችው ኢራን ድርድርን የምትመለከተው ከጦርነት ጎን ለጎን እንዳለ የትግል ስትራቴጂ እንደሆነም አክለዋል።

9. 15 ሀምሌ 2026አሜሪካ አዳዲስ ጥቃቶችን ስትፈጽም ኢራን በበኩሏ ተጨማሪ የንግድ መስመሮችን እንደምትዘጋ አስጠነቀቀች

   አሜሪካ በወታደራዊ ዒላማዎች ላይ ተጨማሪ ድብደባዎችን ስትፈጽም ኢራን በቀጣናው የሚገኙ ተጨማሪ የንግድ መስመሮችን እንደምትዘጋ አስጠነቀቀች።

   የኢራን አብዮታዊ ዘብ አሜሪካ “ጠብ አጫሪነቷን” እስክታቆም ድረስ የሆርሙዝ ወሽመጥ ዝግ ሆኖ እንደሚቆይ ተናግሯል።

   አክሎም በቀጣናው የሚገኙ ተጨማሪ የነዳጅ እና ጋዝ መላኪያ መስመሮችን እንደሚዘጋ አስጠንቅቋል።

   ማስጠንቀቂያው የተሰማው የአሜሪካ ጦር ማዕከላዊ ዕዝ (ሴንቲኮም) ሌሊቱን ካካሄደው የሰባት ሰዓት ድብደባ ተከትሎ የድሮን፣ የአየር እና የባሕር ጥቃቶችን መፈጸሙ ካስታወቀ በኋላ ነው።

   ከቅርብ ቀናት ወዲህ በአሜሪካ እና በኢራን መካከል የተቀሰቀሰው አዲስ ጦርነት ለዓለም ምጣኔ ሃብት ወሳኝ የሆነውን የባህር ወሽመጥ እንቅስቃሴ አልባ አድርጎታል።

   ይህ ጥቃት ወሳኝ የነዳጅ መተላላፊያ በሆነው የሆርሙዝ ወሽመጥ ላይ መርከቦች መንቀሳቀስ ባለመቻላቸው የነዳጅ ዋጋ ዳግም እንዲጨምር አድርጓል።

   የአሜሪካ ጦር ማዕከላዊ ዕዝ ረቡዕ ማለዳ የተፈጸሙ ጥቃቶች “የኢራን ጦር በንግድ መርከቦች ላይ ተጨማሪ ጥቃት መፈጸም እንዳይችል በማድረግ አቅሙን ያዳከሙ ናቸው” ሲል አስታውቋል።

   የሴንቲኮም ባለሥልጣናት አክለውም ለ90 ደቂቃ ያህል የኢራን የባሕር ዳርቻ መከላከያዎች እና ክሩዝ ሚሳዔል ማከማቻ ላይ ድብደባ ተፈጽሟል ብለዋል።

   ማክሰኞ ዕለት የአሜሪካው ፕሬዚዳንት ዶናልድ ትራምፕ ኢራን ወደ ድርድር የማትመለስ ከሆነ በሚቀጥለው ሳምንት ድልድዮቿን እና የኃይል ማመንጫዎቿን እንደሚደበድቡ ዝተው ነበር።

10. 15 ሀምሌ 2026ከ300 በላይ ናይጄሪያውያን ከደቡብ አፍሪካ ወደ አገራቸው ተመለሱ

    ናይጄሪያ ስድስተኛው እና የመጨረሻ ነው ባለችው ጉዞ ወደ አገራቸው ለመመለስ ፈቃደኛ የሆኑ 306 ሰዎችን ወደ አገራቸው መመለሷን አስታወቀች።

    ተመላሾቹ ዛሬ ረፋድ ላይ በሌጎስ በሚገኘው ሙርታላ ሙሐመድ ዓለም አቀፍ አውሮፕላን ደርሰዋል።

    በደቡብ አፍሪካ መጤ ጠል ዘመቻ ዳግም ካገረሸ በኋላ ወደ አገራቸው በፈቃደኝነት የተመለሱት ናይጄሪያውያን ቁጥር ከ1200 በላይ መሆኑ ተገልጿል።

    በደቡብ አፍሪካ በዚህ ዓመት አጋማሽ ላይ የተጀመረው መጤ ጠል እንቅስቃሴ በብዛት ሰላማዊ የነበረ ቢሆንም፤ ነገር ግን በአንዳንድ አካባቢዎች ብጥብጥ፣ ማስፈራራት እና የሕይወት መጥፋት ተከስቷል።

    የደቡብ አፍሪካ ፖሊስ በተፈጠሩ ክስተቶች ዙሪያ ምርመራ እያደረገ መሆኑን አስታውቋል።

    የናይጄሪያ መንግሥት ንግዳቸውን፣ ቤታቸውን እና ያላቸውን ንብረት ትተው ከደቡብ አፍሪካ እንዲወጡ ለተደረጉ ዜጎቹ ካሳ እንደሚጠይቅ አስታውቋል።

    የደቡብ አፍሪካ ባለሥልጣናት በበኩላቸው ምንም ዓይነት ካሳ እንደማይከፍሉ ተናግረዋል።

    በናይጄሪያ ምክር ቤት የዲያስፖራ ጉዳዮች ኮሚቴ በደቡብ አፍሪካ በሚገኙ ስደተኛ ዜጎቹ ላይ የደረሰውን እና ከአገር መውጣታቸውን ተከትሎ የሁለቱ አገራት ግንኙነትን እያጤነው መሆኑን አስታውቋል።

    የደቡብ አፍሪካ መንግሥት ከአምስት ሳምንታት በፊት "የስደተኞች አስተዳደር" ላይ ዘመቻ ከከፈተ በኋላ ከ53,000 በላይ የውጭ ዜጎች ከአገር መባረራቸውን ወይንም እንዲወጡ መደረጋቸውን አስታወቀ።

    እነዚህ ስደተኞች ከማላዊ፣ ከዚምባብዌ እና ከሞዛምቢክ የመጡ መሆናቸውን የገለጹት ባለሥልጣናቱ፤ ቁጥሩ ከዚህም በላይ ሊጨምር ይችላል ብለዋል።

    በደቡብ አፍሪካ ለተከታታይ ሳምንታት ፀረ ስደተኛ ሰልፎች ከተካሄዱ እንዲሁም አለመረጋጋት፣ ማስፈራራት እና ዘረፋ ከተፈጸመ በኋላ በአገሪቱ ያለ ሕጋዊ የመኖሪያ እና የሥራ ፈቃድ የሚገኙ ስደተኞች ላይ ሰፊ የተባለ ዘመቻ እያካሄደች ትገኛለች።

11. 15 ሀምሌ 2026አሜሪካ በኢራን ላይ የምትፈጽመውን ጥቃት ስታስፋፋ፣ ኢራን ምላሿ የበለጠ የከፋ እንደሚሆን አስታወቀች

    የአሜሪካ ጦር ሠራዊት ማዕከላዊ ዕዝ (ሴንትኮም) ዛሬ ረቡዕ ከሰዓት በኋላ በኢራን ላይ ከፍተኛ ተከታታይ ጥቃት መፈጸሙን ሲያስታውቅ፣ ኢራን የአጸፋ ምላሿ ዒላማ የሚሆኑ ተቋማትን መጠን እንደምትጨምር ገለጸች።

    በአገሪቱ የሰዓት አቆጣጠር ሰባት ሰዓት ተኩል ላይ አሜሪካ የፈጸመችው ጥቃት ኢራን በሆርሙዝ ወሽወመጥ በኩል በሚያልፉ መርከቦች ላይ ጥቃት እንዳትፈጽም ለማድረግ ያለመ መሆኑን ተገልጿል።

    ማዕከላዊ ዕዙ በኤክስ ገጹ ላይ ባሠራጨው መረጃ "እነዚህ ጥቃቶች የኢራን ኃይሎች በሆርሙዝ ወሽመጥ በጭነት መርከቦች ላይ ጥቃት የሚፈጽሙበትን ወታደራዊ አቅም የበለጠ ለማዳከም” የተፈጸሙ መሆናቸውን አስታውቋል።

    የኢራን አብዮታዊ ዘብ አሜሪካ በኢራን ላይ ማካሄድ የቀጠለችው ጥቃት ኢራን በአጸፋ ጥቃት ዒላማ የምታደርጋቸውን ተቋማት እንድታሰፋ ሊያደርጋት እንደሚችል አስጠንቅቋል።

    በዚህም በአካባቢው የሚገኙ የአሜሪካ አጋር የሆኑ አገራት የነዳጅ እና የጋዝ ምርቶች ማውጫዎች፣ ማጣሪያዎች እና መተላለፊያዎች ዒላማ ሊሆኑ እንደሚችሉ ገልጿል።

    አሜሪካ በኢራን ላይ ባለፉት ቀናት ተከታታይ ጥቃቶችን እየፈጸመች ሲሆን፣ ኢራንም በምላሹ በዮርዳኖስ፣ በባህሬን፣ በኩዌት እና በአረብ ኤምሬትስ ውስጥ የሚገኙ የአሜሪካ የጦር ሰፈሮች ላይ ጥቃት እያደረሰች ነው።

    በአሜሪካ እና በኢራን መካከል የተደረሰው የተኩስ አቁም ካበቃ በኋላ በቀጠለው ጥቃት በሆርሙዝ ወሽመጥ በኩል የሚያልፉ መርከቦች የጥቃት ዒላማ እየሆኑ ነው።

    አሜሪካ የኢራንን ጥቃት ለመከላከል በሆርሙዝ ላይ ጥበቃ እያካሄደች መሆኗን እና ወደ ኢራን የሚያቀኑ እና ከኢራን የሚነሱ ሁሉም መርከቦች በመተላለፊያው በኩል እንዳያቋርጡ ዕገዳ ጥላለች።

12. 15 ሀምሌ 2026በዩኬ የ16 እና 17 ዓመት ታዳጊዎች በምሽት ማኅበራዊ ሚዲያ እንዳይጠቀሙ የሰዓት እላፊ ገደብ ሊጣል ነው

    በዩናይትድ ኪንግደም ከ16 ዓመት በላይ የሆኑ ታዳጊዎች የማኅበራዊ ትስስር ገፆች ላይ የምሽት የሰዓት እላፊ የሚጥል ዕቅድ ወጣ።

    ታዳጊዎቹ የአካውንታቸውን መለያ በማስተካከል ግን እግዱን ማለፍ ይችላሉ።

    የሰዓት እላፊ ደገቡ እንደ ኢንስታግራም፣ ቲክቶክ እና ዩቱዩብ የመሰሉ መተግበሪያዎች ለ16 እና 17 ዓመት ታዳጊዎች ከእኩለ ሌሊት እስከ ንጋት ጠዋት ድረስ እንዳይሠሩ የሚያደርግ ነው።

    የአገሪቱ መንግሥት “ሱስ አስያዥ” የሆኑ እንደ ‘አውቶ ፕለይ’ እና ያለማቋረጥ ‘ስክሮል’ ያሉ አሠራሮችን ለማስቆም ፍላጎት አለው።

    ይህ እርምጃ ከሰዓት እላፊ ገደቡ ጋር ተጨምሮ የታዳጊዎችን ትኩረት፣ እንቅልፍ እና የቤተሰብ ሕይወት ያሻሽላል ተብሏል።

    ይሁን እንጂ የመንግሥት ዕቅድ ታዳጊዎችን ልቅ ከሆነ የማኅበራዊ ሚዲያ አጠቃቀም የሚገታ አይደለም በሚል ጠንካራ እርምጃዎች እንዲወሰዱ እየወተወቱ ነው።

    አዲሱ ዕቅድ ባለፈው ሰኔ ወር ከ16 ዓመት በታች ለሆኑ የዩኬ ታዳጊዎች በርካታ መድረኮችን እንዳይጠቀሙ መታገዳቸውን ተከትሎ የተሰማ ነው።

    የዩኬ የበይነ መረብ ደኅንነት ሚኒስትር የሆኑት ኬኒሻካ ናራያን ለቢቢሲ ፖሊሲውን ተከላክለው የሞገቱ ሲሆን፤ አሠራሮች ላይ የሚደረጉ ለውጥች እና የሰዓት ገደቡ ብሪታኒያ የቴክኖሎጂ ኩባንያዎች ላይ ጠበቅ ያሉ እርምጃዎችን የምትወስድ አገር ያደርጋታል ብለዋል።

    አዲስ የቀረበው ዕቅድ ከወራት በኋላ ለሕዝብ ተወካዮች ምክር ቤት እንደሚቀርብ ይጠበቃል።

    የዩናይትድ ኪንግደም መንግሥት ቀጣይ እርምጃዎች የታዳጊዎች “የኤአይ ቻትቦት” ደኅንነት ላይ እንደሚወሰዱ አመልክቷል።

13. 15 ሀምሌ 2026አሜሪካ ከ130 ሚሊዮን ዶላር በላይ የሚያወጣ የኢራን ዲጂታል ሃብት ላይ ማዕቀብ ጣለች

    ከ130 ሚሊዮን ዶላር በላይ የሚያወጣ የኢራን ዲጂታል ሃብት ላይ ማዕቀብ መጣሉን የአሜሪካ ግምጃ ቤት ኃላፊ ስኮት ቤሳንት ተናገሩ።

    በኤክስ ገጻቸው ባሰፈሩት ጽሑፍ “የአሜሪካ ግምጃ ቤት የዲጂታል ሃብት ብዝበዛን ጨምሮ የኢራንን ሕገ ወጥ የፋይናንስ እንቅስቃሴዎች ለመግታት ቁርጠኛ ነው” ብለዋል።

    የአሜሪካ ግምጃ ቤት የውጭ ሃብት ቁጥጥር ክፍል ከኢራን ብሔራዊ ባንክ ጋር የተያያዙ በርካታ አካውንቶች ላይ ማዕቀብ እንደጣለ አስታውቀዋል።

    “ሕገ ወጥ ገንዘብን ወደ ሕጋዊ መስመር የማስገባት ሒደትን በማስቆም የኢራን መንግሥት የሚያገኘውን ያልተገባ ገቢ እንገታለን” ሲሉም ተናግረዋል።

    ማዕቀብ የተጣለባቸው የኢራን አካውንቶች ማዕቀብ በተጣለባቸው የቴህራን ባክኮች ስም በየዓመቱ “በቢሊዮን ዶላሮች የሚቆጠር” ገንዘብ እንደሚያንቀሳቅሱ ተመልክቷል።

    የኢራን መንግሥትን ሕገ ወጥ የፋይናንስ እንቅስቃሴ ለማሳለጥ በወረቀት ላይ ብቻ ያሉ ሐሰተኛ ኩባንያዎች መጠቀማቸውም ተጠቅሷል።

14. 15 ሀምሌ 2026ለኢራን መረጃ አሳልፎ ሰጥቷል የተባለ የእስራኤል ወታደር ተፈረደበት

    ለኢራን በመሰለል የተከሰሰ አንድ የእስራኤል ጦር ሠራዊት አባል በወታደራዊ ፍርድ ቤት የአምስት ዓመታት እስር እንደተፈረደበት የእስራኤል መካለከያ ኃይል አስታወቀ።

    ወታደሩ የገንዘብ ጥቅም ለማግኘት ሲል በጦርነት ወቅት ከኢራን የተተኮሰ ሚሳዔል ሲከሽፍ የሚያሳይ ቪዲዮን ጨምሮ ለኢራን የስለላ ወኪል መረጃዎችን በማስተላለፍ ነው የተከሰሰው።

    የእስራኤል የመከላከያ ኃይል እንዳለው ወታደሩ ምሥጢራዊ የደኅንነት መረጃ ቪዲዮዎች እና ፎቶግራፎችን በመላክ ገንዘብ እንደሚያገኝ የሚገልጹ በርካታ የቴሌግራም መልዕክት ልውውጦችን አድርጓል።

    በዚህም ወታደሩ ባለፈው ዓመት ሰኔ ወር ላይ እስራኤል ከኢራን ጋር ባደረገችው የ12 ቀናት ጦርነት ወቅት ሁለት ቪዲዮዎችን እንደላከ እና "ለእነሱም ክፍያ እንደተቀበለ" የእስራኤል ጦር ተናግሯል።

    በጦርነቱ ወቅት በኢራን ጥቃት በተጎዱ ቦታዎች በሚደረግ የቪዲዮ ቀረጻ ላይ ከባድ ገደቦች ተጠጥለው የነበረ ቢሆንም፣ ወታደሩ በከተማ አካባቢዎች የተቀረጹ በርካታ ቪዲዮዎችን ለ"ኢራናዊው ወኪል" አጋርቷል ሲል አክሏል።

15. 15 ሀምሌ 2026ኢራን ወደ ውይይት ካልተመለሰች የኃይል ማመንጫዎቿ እና ድልድዮቿ እንደሚመቱ ትራምፕ አስጠነቀቁ

    ኢራን ወደ ውይይት ካልተመለሰች የኃይል ማመንጫዎቿ እና ድልድዮቿ ላይ በቀጣይ ሳምንት ጥቃት እንደሚሰነዘር ፕሬዝዳንት ዶናልድ ትራምፕ አስጠነቀቁ።

    ትራምፕ ይህንን ያሉት ከፎክስ ኒውስ ጋር ባደረጉት ቃለ ምልልስ ሲሆን፤ በሆርሙዝ ወሽመጥ የሚያልፉ መርከቦች 20% ክፍያ እንዲፈጽሙ ያቀረቡትን ሐሳብም ሰርዘዋል።

    ትራምፕ በኢራን ወደቦች ላይ የጣሉት እገዳ ግን ባለበት እንደሚቀጥል ተናግረዋል።

    “በቀጣይ ሳምንት ነገሮች የከፉ ይሆኑባቸዋል። ወደ ድርድር ጠረጴዛው የማይመለሱ ከሆነ የኃይል ማመንጫዎቻቸውን እናፈርሳለን፤ ድልድዮቻቸውን እናፈርሳለን” ብለዋል።

    የተባበሩት መንግሥታት የሰብአዊ መብቶች ከፍተኛ ባለሥልጣን ቮልከር ቱርክ የትራምፕን ዛቻ ኮንነዋል።

    ትራምፕ በኢራን የሲቪሎች መሠረተ ልማት ላይ ጥቃት ለማድረስ መዛታቸው “በዓለም አቀፍ ሕግ የተከለከለ” መሆኑን ገልጸዋል።

    “ሆነ ብሎ ንጹኃን ዜጎች ላይ እና መሠረተ ልማት ላይ ጥቃት መፈጸም የጦር ወንጀል ነው" በማለትም አክለዋል።

16. 14 ሀምሌ 2026የኢራን ፓርላማ አባላት ለመሪያቸው ግድያ የሚወሰድን የበቀል እርምጃ እንደሚደግፉ አሳወቁ

    ከአንድ መቶ ሰማኒያ በላይ የኢራን ፓርላማ አባላት አገራቸው በአሜሪካ እና በእስራኤል ጥቃት የተገደሉትን ጠቅላይ መሪ ደም ለመበቀል በምታደርገው ሁሉ በአንድነት እንደሚቆሙ ቃል ገቡ።

    አባላቱ በጻፉት ደብዳቤ የአገሪቱ ታላላቅ የሃይማኖት እና የመንግሥት አካላት፤ የአገሪቱን መሪ የገደሉትን መበቀላቸው አስገዳጅ ነው የሚል ውሳኔ አስተላልፈዋል። "ለሚወሰደው ተግባራዊ እርምጃ” ሙሉ ድጋፋቸውን እንደሚሰጡም አሳውቀዋል።

    አሜሪካ እና እስራኤል ባለፈው የካቲት ወር መጨረሻ ለወራት የዘለቀውን ጦርነት በኢራን ላይ በከፈቱበት የመጀመሪያ ዕለት እና ከዚያ በኋላ ጠቅላይ መሪው አያቶላህ አሊ ኻሜኒ እና ሌሎች በርካታ የፖለቲካ እንዲሁም ወታደራዊ መሪዎች ተገድለዋል።

    ጠቅላይ መሪው ከተገደሉ ከአራት ወራት በኋላ ስንብት እና ቀብር ባለፈው ሳምንት ለቀናት በዘለቀ ከፍተኛ ሥነ ሥርዓት ተካሂዷል።

    የኢራን ባለሥልጣናት በሚሊዮኖች የሚቆጠሩ ሰዎች ታድመውበታል ባሉት የስንብት ሥነ ሥርዓቶች ላይ የተገኙ ኢራናውያን ለተፈጸመው ግድያ መንግሥታቸው የበቀል እርምጃ እንዲወሰድ ጠይቀዋል።

    ለዚህም ዋነኛው ዒላማ ናቸው ያሏቸውን የአሜሪካ ፕሬዝዳንትን ስም እና ምሥል ይዘው ነበር።

    በተያያዘም ኢራን ፕሬዝዳንት ትራምፕን ለመግደል አዲስ ዕቅድ ስለማውጣቷ እስራኤል አገኘሁት ያለችውን መረጃ ለአሜሪካ መስጠቷን ዎል ስትሪት ጆርናል ጋዜጣ ባለፈው ሳምንት ዘግቧል።

17. 14 ሀምሌ 2026ፕሬዝዳንት ትራምፕ ሆርሙዝ ‘ከኢራን በስተቀር’ ለሁሉም መርከቦች እንቅስቃሴ ክፍት ነው አሉ

    ፕሬዝዳንት ዶናልድ ትራምፕ ወሳኝ የነዳጅ እና የጋዝ መተላለፊያ የሆነው ሆርሙዝ ወሽመጥ ከኢራን መርከቦች በስተቀር በሌሎች አገራት ለሚደረጉ የባሕር ጉዞዎች ክፈት ነው አሉ።

    ፕሬዝዳንቱ በትሩዝ ማኅበራዊ ሚዲያ ገጻቸው ላይ ባሰፈሩት ጽሑፍ ሆርሙዝ “ከኢራን በስተቀር ለሌሎች ሁሉም የመርከቦች እንቅስቃሴ ክፍት ነው” ብለዋል።

    ፕሬዝዳንቱ፤ የኢራን መርከቦች በመተላለፊያው እንዳይንቀሳቀሱ ያገዱት “ወደ ሙሉ ውድመት እያመሩ ባሉት ውሸታም፣ ጠበኛ እና አደገኛ መሪዎቿ” ምክንያት መሆኑን ጠቅሰዋል።

    ጨምረውም ለአሁን ዕቀባው “የየትኛውንም ዓይነት የኢራን ጭነቶችን ይዘው ከኢራን እና ወደ ኢራን ወደቦች የሚጓዙ መርከቦችን ብቻ” የሚመለከት መሆኑን፤ ነገር ወደ “ሙሉ ዕቀባ” እንደሚሸጋገር አመልክተዋል።

18. 14 ሀምሌ 2026እስራኤል ለማንኛውም የኢራን ጥቃት የምትሰጠው ምላሽ “እጅግ ኃይለኛ” እንደሚሆን ኔታንያሁ ተናገሩ

    የእስራኤል ጠቅላይ ሚኒስትር ቤንያሚን ኔታንያሁ፤ ኢራን አስቀድማ ጥቃት የምትፈጽም ከሆነ አገራቸው የምትሰጠው የአጸፋ ምላሽ ከዚህ ቀደሞ ከነበረው “በበለጠ እጅግ ኃይለኛ” እንደሚሆን አስጠነቀቁ።

    “ለኢራን መሪዎች ይህንን እናገራለሁ፤ የምታጠቁን ከሆነ [አሁን] ነገሮች ዝም ማለታቸው ላይ እንዳትተማመኑ” ሲሉ ማኅበራዊ ሚዲያ ገጻቸው ላይ በለጠፉት ቪዲዮ ተናግረዋል።

    ከዚህ ቀደም ኢራን ጥቃት ስትፈጽም የተወሰደው አጸፋ “ቀድሞውንም ኃይለኛ” የነበረ ቢሆንም በቀጣይ የሚኖረው የእስራኤል ምላሽ ግን ተመሳሳይ እንደማይሆን ገልጸዋል።

    “አንድ አካል ሲያጠቃን በሁለት እጥፍ መልሰን የማናጠቃባቸው ቀናት አልፈዋል” ሲሉም ተደምጠዋል።

    “ይህንን በኢራን የክፋት ጥምረት ላይ አድርገዋል፤ ሊጎዳን በሚፈልግ ማንኛው አካል ላይ ማድረጋችንን እንቀጥላለን። የምናደርገው እንደዚያ ነው” በማለት በቪዲዮ መልዕክታቸው ተናግረዋል።

19. 14 ሀምሌ 2026የአውሮፓ አየር መንገዶች በፋርስ ባሕረ ሰላጤ አገራት የአየር ክልል እንዳይበሩ ማስጠንቀቂያ ተሰጣቸው

    የአውሮፓ ኅብረት የአየር ትራንስፖርት ደኅንነት ተቋም አየር መንገዶች ጦርነት ባገረሸበት የፋርስ ባሕረ ሰላጤ አካባቢ ባሉ አገራት እና የባሕር ክልሎች ላይ እንዳይበሩ አስጠነቀቀ።

    ካለፈው ሳምንት ጀምሮ አሜሪካ እና ኢራን እያካሄዱት ባለው ጥቃት ሳቢያ ጋብ ብሎ የነበረው ጦርነት ከተባባሰ በኋላ ወሳኙ የባሕር ላይ መተላለፊ ሆርሙዝ ተዘግቷል።

    አሁን ደግሞ የአውሮፓ የአየር ትራንስፖርት ደኅንነት ተቋም የመጓጓዣ አውሮፕላኖች በባህሬን፣ በኩዌት፣ በኳታር፣ በአረብ ኤምሬት እንዲሁም በባሕረ ሰላጤ ላይ እንዳይበሩ አስጠንቅቀወል።

    ተቋሙ እንዳለው "ተገማች ያልሆኑ ወታደራዊ ሁኔታዎች ጥቅም ላይ እየዋሉ ያሉ ሚሳዔሎች፣ ድሮኖች፣ ተዋጊ አውሮፕላኖች እና የአየር መከላከያ ሥርዓቶች በአንድ ላይ” በቀጣናው በሚደረጉ የአየር ትራንስፖርት በረራዎች ላይ “ከፍተኛ አደጋን” ደቅነዋል።

    ተቋሙ ለአየር መንገዶች የሰጠው ማስጠንቀቂያ ለሁለት ሳምንታት የሚቆይ መሆኑን እና በፋርስ ባሕረ ሰላጤ አካበቢ ያለውን ሁኔታ በቅርበት እንደሚከታተል ገልጿል።

20. 14 ሀምሌ 2026በኦማን ባሕር ዳርቻ መርከብ ላይ ጥቃት ከደረሰ በኋላ በኢራን ከተሞች ፍንዳታ ተሰማ

    የኢራን የሲቪል ኒውክሌር ጣቢያ በሚገኝበት ቡሼህር ከተማን ጨምሮ በተለያዩ የአገሪቱ ከተሞች ፍንዳታዎች መሰማታቸውን የቴህራን የመንግሥት መገናኛ ብዙኃን ዘገቡ።

    ሌላኛው የወደብ ከተማ ባንዳር አባስ እና አባዳን ከተማም እንደተመቱ ተገልጿል። የኢራን መገናኝ ብዙኃን ዘገባ እንደሚያሳየው ብቸኛው የኢራን የሲቪል ኒውክሌር ጣቢያ በሚገኝባት ቡሼህር ከተማ ውስጥ በአራት የተለያዩ ቦታዎች ጥቃት ተፈጽሟል።

    የግዛቱ ምክትል ገዥ ኢህሳን ጃሃኒአን በከተማው የሚገኙ “የተለያዩ አካባቢዎች በጠላት ተተኳሾች” ተመትተዋል ማለታቸውን መንግሥታዊው የዜና ወኪል ኢርና ዘግቧል። ወደብ ከተማ በሆነው ማህሻህርም ፍንዳታ መሰማቱን መገናኝ ብዙኃኑ አስታውቀዋል።

    እነዚህ ጥቃቶች መፈጸማቸው የተሰማው፤ በኦማን ባሕር ዳርቻ ላይ አንድ ነዳጅ ጫኝ መርከብ “ባልታወቀ የውጭ መሣሪያ” እንደተመታ ከተገለጸ በኋላ ነው።

    የመርከቡ ባለቤት የሆነው ኩባንያ እንደገለጸው ‘ስቶልት ማግኒዚየም’ የተባለው ነዳጅ ጫን የተመታው በአረቢያን ባሕር ላይ እየተጓዘ በነበረበት ሰዓት ነው። የመርከቡ የሞተር ክፍል እሳት ቢያያዝም የተጎዳ ሰው አለመኖሩ ተገልጿል።

    በተጨማሪም ኢራን በሆርሙዝ ወሽመጥ ሲገወዙ የነበሩ ሁለት ነዳጅ ጫኝ መርከቦችን መምታቷን አስታውቃለች።

    በዚህ ጥቃት ሕንዳዊ ባሕርተኛ መገደሉን ያስታወቀው የተባበሩት አረብ ኤምሬቶች መከላከያ ሚኒስቴር እርምጃ “ድፍረት የተሞላበት” እርምጃ አውግዟል።