Liiverpuul v Riyaal Maadirid, Baayern Muunik v PSG, Arsenal gara dursummaa Shaampiyoonsi Liigiitti

Haguuggii Tamsaasa Kallattii

Zelalem T Duressa

1. 5 Sadaasa 2025Wayinii Ruunii fi Vaan Daayik ammas tamasaasa kallattiin dubbiin wal tuqan

   Liiverpuul akkuma Riyaal Maadiridiin mo'ateen gaazexeesitoonni Amaazon Vaan Daayik waamuun haala taphichaa gaafatan.

   Gaazexessaan Gaabii Loogan jedhamu erga Maan Yuunaayitid 2-1 isin mo'ee fooyya'aa jirtu jechuun gaafata.

   'Vaan daayik ''amma akkas jedhanii odeessuun salphaadha. Tapha lama wlaitti aansuun waan mo'anneef. Garuu yeroo addunyaa jeequmsaa fi hookkara qabu keessa galtu, haalli siif qajeeluu didu of tasgabbeessuun hojjechuu qabda.

   Yeroo Yuunaayitid nu mo'ate yeroon isaa Onkoloolessa. Tapha hedduutu fuuldura keenya jira. Kubba miilaa keessatti yeroo gabaabduu keessatti waan hedduun jijjiramuu, wal jala darbuu danda'a'' jedhe.

   Vaan Daayik ''waci alaa dhagahamu guddaadha'' jedhe. Yeroo sana Wayinii Ruunii garee sana keessa jira ture.

   Torbee darbe ammoo Ruuniin, Liiverpuul gaggeessaa garii hin qabu jechuun Vaan daayikiin qeeqee ture.

   Vaan Daayik yeroo sana xiinxala ''nama dhadhabaati'' jechuun deebiseeraafi.

   Kaleessa yeroo dubbii kana dubbatu gaazexessaa sun ''as keessaa nama jechuunii barbaadde jiraa? jedhee ofirra naanna'ee ilaale.

   Vaan daayik: ''Lakki, waa'ee mataa ofii gadi qabatanii jabaatanii hojjechuu jechuu barbaadeeni jedhee seeqe. Ruuniidhaan beekumsaa fi hubannaadhaan akka xiinxaluuf ergaa dabarseera.

   Wayinii Ruunii ammoo kana caalaa hin dubbadhu. Dubbiidhaan isaan tuqee akka isaan onnatanii mo'atan isaan gargaareera.

   Shaampiyoonaa Piriimer Liigii taatee akkamitti walitti aansitee tapha sadii afur mo'amta kan jedhu irraa madde jedhe.

   Vaan daayik ammoo carraa dursummaa argateen yeroo akaksii injifannoof isaan dhaqabsiisuu barbaadeeni. Akka mo'ataniifi jedhe.

2. 5 Sadaasa 2025Liiverpuul dirree isaa irratti Riyaal maadirid mo'ate

   Liiverpuul dirree isaa irratti galchii Maak Alisteriin Riyaal Maadirid mo'ate.

   Bu'aa taphoota Shaampiyoonsi Liigii har'aa:

   Islaaviyaa Piraahuu 0-3 Arsenaal

   Liiverpuul 1- 0 Riyaal Maadirid

   PSG 1-2 Baayern Muunik

   Juvantas 1-1 Ispoortiing Liisban

   Atileetikoo Maadirid 3-1 Yuuniyeen St Giloosee

   Tootenhaam 4-0 Kooppenhaagen

   Hordoftoota keenya, waan nu hordoftaniif ulfaadhaa. Har'a asuma irratti xumurre. Bor walitti deebina.

   Halkan Gaarii"

3. 5 Sadaasa 2025Luwis Diyaaz kaardii diimaa

   Luwis Diyaaz balleessaa Hakiimii irratti hojjeteen kaardii diimaan bahe.

   Luwis Diyaaz galchii lama lakkoofsisee kaardii diimaan dirreetii bahe. Osmaan Dembeelee kan badhaasa Ballon d'Or mo'ates miidhamee baheera. PSG duubaa ka'ee qabxii argataa?

4. 4 Sadaasa 2025PSG 0-2 Baayern Muunik- 45'

   Baayern Muunik Paarisitti imaluun galchii Luwis Diyaaz lamaaniin 2-0 PSG dursaa jira.

   Dursaan taphattoota PSG Maarkoniyoos dogogora hin taane hojjete. Diyaaz kubba isarraa buusise lakkoofsise.

   Riyaal Maadiridii fi Liiverpuul galchii malee jiru. Arsenaal mo'ateera.

   Tootenhaam 1-0 Koopen Haagen dursaa jira.

5. 4 Sadaasa 2025GOOL- PSG 0-1 Baayern Muunik

   Luwis Diyaaz taphni jalqabee daqiiqaa 4 irratti PSG irratti lakkoofsise. Kamtu mo'ata? Shaampiyoonaan bara darbee dirree isaa irratti qorame.

   Diyaaz bara kana Liiverpuul irraa Baayern kan gale galchii jalqabaa lakkoofsise.

6. 4 Sadaasa 2025Zhaavii Alonsoo fi Aarnoold Aanfiilditti argamuun gadda Deegoo Jootaa ibsatan

   Zhaavii Aloonsoo Liiverpuuliif yeroo taphataa ture maqaa guddaa qaba ture. Booda Riyaal Maadirid gale.

   Aleeksaander Arnoold achuma Liiverpuul keessatti guddate. gahumsa ajaa'ibaa Liiverpuul keessatti agarsiiseera.

   Dursaa taphattootaa tahuun yeroo taphates ture.

7. 4 Sadaasa 2025Islaaviyaa Piraahuu 0 - 3 Arsenaal

   Har'as Arsenaal irratti gooliin tokkollee galuu dide.

   Yoom irratti lakkaa'ama jettu? Waancaa Shaampiyoonsi Liigii fi Piriimer Liigii mo'achuu waan hafu miti.

   Ijoollee waggaa 15 dabalatee gareen har'a Arteettaan hiriirsise guutummaatti dirree isaaniin ala caaluun mo'atan.

8. 4 Sadaasa 2025Liiverpuul v Riyaal Maadirid- Tapha cimaa eegamu

   Liiverpuul taphoota kudhan irratti Riyaal maadiridiin morkateera.

   Xumura waancaa Shaampiyoonsi Liigii Serjiyoo Raamos Mohaammad Saalaa jalqabuma irratti miidhee ittiin dirree keessaa bahe dabalatee.

   Taphicha irratti karra eegaan Liiverpuul yeroo sanaa Kaariyuus balleessaa tasumaa isa irraa hin eegamne hojjechuun galchiin irratti lakkaa'ame.

   Gaarez Beel kubba ofirra garagalee dhahe ykn Baayiskil Kiik lakkoofsiseen galchii bareedduu jedhamtee galmooftefii ture.

   Waliigalaan Liiverpuul taphoota 10 keessaa tokko qofa mo'ate.

   Lama qixa bahuun torba mo'ameera. Har'a Aleeksaander Arnoold erga Liiverpuul gadhiisee yeroo jalqabaaf Aanfiildi dirree irratti guddate irratti morkataa tahee taphata.

   Fakkiin isaa deeggartootaan manca'ee ture. Booda qulqulleeffamaa ture. Liiverpuul tapha mo'achuuf rakkataa jira. Imbaappeen garuu galchii hedduu lakkoofsisuun gahumsa addaa irra jira.

   Maaltu eegama jettu?

9. 4 Sadaasa 2025Arseenaal galchii 1-0 Islaaviyaa Pirahuu dursaa jira

   Galchii rukuttaa peenaaliitii argamte Bukaayoo Saakaa lakkoofsisuun Arsenaal 1-0 dursee boqannaa bahe.

   Arsenaal irratti galchii lakkaa'amuu dhabuun ittisni isaa ammas hagam amansiisaa akka tahe agarsiisa.

10. 4 Sadaasa 2025Arsenaal Meerinoo sarara duraa irra hiriirsise

    Arsenaal tapha Shaampiyoonsi Liigii kileba biyya Cheek Islaaviyaa Piraahuu waliin qabuuf bakka Giyookeres Mikeel Meeriinoo hiriirsise.

    Sarara duraa irra Kaayi Haaverti, Giyookresii fi Gabri'eel Yesus kan miidhaman yoo tahu filannoo Artaattaan qabu Meerinoo qofa.

    Tapha kanaaf ittisa irra Tiimber, Saalibaa, Magaalesh fi Hinkaappee hiriirsise.

    Sarara gidduu Nawaneerii, Noorgaardii fi Raayis, sarara duraa irra ammoo Tiroosaad, Meeriinoo fi Saakaa taphachiisa.

    Arsenaal taphoota sadii irraa qabxii sagal haga ammaatti argateera.

11. 4 Sadaasa 2025Taphataa Arsenaal tahuuf xiqqumatu na hafee ture- Roonaaldoo

    Kiristaanoo Roonaaldoo taphataa Arsenaal tahuuf fiixee irra gaheen ture jedhe.

    ''Taphataa Arsenaal haaraa tahuuf dhumarra gaheen ture. Waanuma xumurame ture. Waliigalteen isaas xumurame jechuun danda'ama. Garuu osoo hin tahiin hafe. Akkasis tahee Arsenaal ana malees garee cimaa ture'' jechuun Piirsi Morgaanitti hime.

    Roonaaldoon gara Maanchister Yuunaayitid kan deeme morkii inni garee Sir Aleeksi Fergusan irratti agarsiiseen ture.

    Maanchister Yuunaayitid Shaampiyoonsi Liigiin osoo Ispoortiing Liisban morkatuu Roonaaldoon akka malee isaan rakkise.

    Fergusan yeroo taphni xumuramu Roonaaldoo ofitti waamuun ''Oldi Tiraafoorditti sin barbaada, si dhiisnee hin deemnu'' jedheen.

    Daariktera kilebichaaf guyyuma sana bilbilee wal gahii taa'uun amansiisan. Taphattoonni Yuunaayitid mucaa kana dhiisnee hin gallu. Har'uma waliigaltee xumuraa jedhanii yaada kennannii ture.

    Kanumaan Arsenaal daqiqiaa dhumaatti dhabuun Roonaaldoon gara Yuunaayitid deeme. Odeessa guutuu asii argattu.

    Daqiiqaa 61ffaa addunyaan kubbaa miilaa Roonaaldoo akka raajeffatu taasifte

12. 4 Sadaasa 2025Kiristaanoo Roonaaldoo barana Arsenaal waancaa Piriimer Liigii mo'ata jedhe

    Kiristaanoo Roonaaldoo barana Arsenaal waancaa Piriimer Liigii mo'ata jedhe.

    Arsenaaliin ''nan jaaladha'' kan jedhe Roonaaldoon 'barana ni mo'atu' jedhee dubbate.

    Piirsi Morgaan waliin turtii kan taasise Roonaaldoon Maanchister Yuunaayitid barana qabxii baay'ee waan caalamanii jiraniif waancaa hin injifatan jedhe.

13. 4 Sadaasa 2025Taphataan Arsenaal Viktar Giyookeres miidhame

    Taphataan Arsenaal Viiktar Giyookeres miidhamuu himame. Tapha Arsenaal Shaampiyoonsi Liigii har'a Islaaviyaa Pirahoo waliin qabu irrattis hin hirmaatu.

    Giyookeres sarbaa isaarra miidhamni mudachuu akka hin hafne ibsame.

    Tapha Barnilee irartti jijjiramee kan bahe Giyookeres galchii jalqabaa lakkoofsisee ture.

    Arteettaan ''na yaadesseera. Kana dura rakkoo miidhama maashaa waan hin qabneef amma maal akka tahe hin barre.

    Waatu isatti dhagahamee bahe. Mallattoo gaarii miti. Keessumaa taphataa ajaa'ibaa akka isaa mudachuun nu yaadessa,'' jedhe.

14. 4 Sadaasa 2025Erliing Haalaand waa'ee rikardii galchii mataasaa cabsuu dubbate

    Taphataan maan Siitii Erliing Haalaand bara kana rikardii ofumasaa kana dura galmeesse cabsuuf akka jedhu dubbate.

    Kana dura waggaa tokko keessatti kilebaa fi biyya isaaf galchii 57 lakkoofsisee Piriimer Liigii keessaa rikardii qabateera.

    Bara kana aduun ganama. Garuu ammumaan galchii 26 Maanchister Siitii fi biyya isaa Noorweyiif lakkoofsiseera.

    Haalaand Rikardii caalaa mo'achuufi akka gareetti waliin qabxii argachuu irratti xiyyeeffata.

    Peep Gaardiyoolaan Haalaand cimina guddaa irra waan jiruuf sarara fuulduraa isatti amaneen taphadha jedhe.

    Sadarkaa Meesii irra gaheeraa jedhamanii kan gaafataman Gaardiyoolaan ''sadarkaa sana miti, garuu taphataa itti dhiyaatee jirudha, galchii lakkoofsisuudhaan yoo tahe'' jedhe.

    Gahumsa tapha kubba miilaan Liyonel Meesiin taphataa seenaa kubba miilaa keessatti jalqaba irratti maqaan isaa ka'u akka tahe hedduun itti waliigalu.

    Meesiin baranuma Mejer Liig Sooker Ameerikaa keessatti galchii 48 lakkoofsisuun badhaafameera.

15. 4 Sadaasa 2025Optaan waa'ee sadarkaa Arsenaalii fi Maanchister Siitii waan haaraa maal ibse?

    Maanchister Siitiin akka duraan sodaatameef miti. Amma Piriimer Liigiinis tahe Shaampiyoonsi Liigiin sadarkaa gaarii irra jira.

    Garuu Arsenaal irraa qabxii jahaan duubatti hafeera. Optan yeroo yerootti ragaa kamtu tilmaama waancaa mo'achuu qaba jedhu baasa.

    Optaan tibbana Maanchister Siitiin carraa waancaa mo'achuu %13.62 qofa qaba jedhe.

    Waancaa Shaampiyoonsi Liigii ammoo carraa mo'achuu %11.78 qaba jedhe.

    Arsenaal carraa waancaa lamaan mo'achuu guddaa qaba jedhe. Piriimer Liigii mo'achuuf %70.05 qaba jedhe.

    Shaampiyoonsi Liigii mo'achuuf ammoo %21.34 qaba jedhe. Arsenaal Waancaa Shaampiyoonsi Liigiif dorgommii bara kana taasise keessatti hin mo'amne.

    Galchii baay'ee lakkoofsisuus dand'eera. Gareen Mikeel Arteettaa bara darbe xumuraaf darbuuf falmatee PSGtu mo'atee darbe.

    Garee kana duraan sadarkaa kana kan gahe PSG barana taphattoota jajjaboo hagasiin carraa waancicha mo'achuu guddaa qaba.

16. 4 Sadaasa 2025'Liyonel Meesiimoo situ caala?' Roonaaldoon deebii kenne

    Kiristaanoo Roonaaldoo gaaffii fi deebii gaazexessaa beekamaa Piirsi Moorgaan waliin tibbana taasisee gidduu kana darba jedhame irratti waan hedduu gaafatameera.

    Namoonni hedduu Mesimoo Roonaaldoo caala kan jedhu irratti waggootaaf wal falmaa turaniiru.

    Viidiyoo gabaabaa Piirsi Morgaan gadhiise irratti Roonaaldoon si moo Mesiitu caala jedhamee gaafatame.

    Gaazexeessichi Mesiin Roonaaldoo caala jedhu. Itti waliigaltaa?'' jedhee gaafate.

    Deebiin isaa ifa ture. Bira qabuus hin dhaqane. ''Meesiitu ana caalaa? Yaada kanatti walii hin galu. Waantan gadi of qabuuf hin qabu,'' jechuun deebise.

    Roonaaldoon yeroo adda addaatti ani Meesii nan caala jedheen amana jedhee dubbataa ture.

    Namoonni yaada barbaadan qabaachuu danda'u.

    Ana yoo gaafatte garuu ani seenaa keessatti taphataa kubba miilaa jabaa jalqaba irratti waamamudha jedhee kana duras dubbateera.

    Roonaaldoon sawud Arabiyaa kilaba Al Naasir keessattis tahe Riyaal Maadirid keessatti miindaa olaanaa argataa ture.

    Roonaaldoon Al Naasir keessatti waggaatti gara paawondii miliyoona 200 ol argata.

    Piirsi Morgaan torban darbe kana biliyoonera taate jedhan dhugaadhaa? jedhee gaafate. Roonaaldoon ''sobadha, ani ergan biliyeenera tahee waggaa baay'ee darbeera'' jechuun deebise.

17. 4 Sadaasa 2025Dorgommii Shaampiyoonsi Liigii Awurooppaa har'aa tamsaasa kallattiin isin biraan geenya

    Arsenaal carraa Shaampiyoonsi Liigii dursuu argachuu qaba.

    Taphni Liiverpuulii fi Riyaal maadirid haalaan eegama.

    PSG V Baayern Muunik- Tapha guddaa har'aati.

    Odeessaalee kaan waliin isiniif dhiyeessina. Turtii gaarii.