'Miidhamarraa dandamadhee qabxii kana galmeessuu kootti baay'een gammada'
Madda suuraa, Getty Images
Atileet Qananiisaa Baqqalaa dorgommii Maaraatonii Vaalensiyaa irratti qabxii argateen guddoo gammaduu BBCtti hime.
Atileetiin ganna 41 kun dorgommii magaalaa Ispeen Vaalensiyaatti Dilbata gaggeffameen sa'aatii 2:04:19 ta'een afraffaa tahuun xumure.
Atileetiin ganna 40 fi isaa ol tahee sa'aatii 2:05 gadi maaraatoonii fiigee kan hin beekne ogguu tahu, gama kanaan rekordii haaraa galmeesseera.
Namni hedduun gama marsaalee hawaasaan umriisaa kanaan dorgommii morkii cimaan itti heddummaatu kana sadarkaa kanaan xumuruu isaatti jajaniiru.
Atileetonni Itoophiyaa kaanis dorgommii kana gama dhiiraafi dubartiin irra aanuun dubbii ijoo tahaniiru.
Sisaay Lammaa 2:01:48n sa'aatii saffisaa addunyaarra afraffaa tahe galmeessuun kan mo’ate yoo ta’u, Worqinash Dagafaa ammoo 2:15:51n irra aante.
Warra dhiirootaan atileetiin Keeniyaa Aleksaandar Mutiisoo lammaffaa, Daawiit Woldee sadaffaa, atileetii gameessi Qananiisaan ammoo afreessoo xumure.
Dubartootaan ammoo Worqinash Daggafaa, Almaaz Ayyaanaa fi Hiwot Gabrakidaan tokkoffaa hanga sadaffaan xumuraniiru.
Atileetiin Yugaandaa fiigicha meetira 5,000 fi 10,000n rikardii addunyaa harkaa qabuufi akkaan eegamaa ture Joshuwaa Cheptegey sadarkaa 37ffaan xumure.
Atileet Sisaay Lammaa injifannoo argate kanaan addunyaarratti atileetii saffisaa yeroo maraa ta’uun sadarkaa afraffaa qabateera.
Barreeffamni kun qabiyyee [social_media-site]n dhiyaatan qaba. Tarii 'cookies' fi teknolojiiwwan biraa fayyadamuu waan danda'aniif, osoo tokkoonsaa gadi hin buufamiin dura hayyama keessan gaafanna. Osoo hin simatin dura Facebookimaammata cookies fi imaammata mateenyaa dubbisuu barbaadda ta'a. Qabiyyee kana ilaaluuf 'waliigaluun itti fufi' filadhu.
Xumura maxxansa Facebook
Oduufi xiinxala kallattiin bilbila keessan irratti argachuuf ammuma
Asiin seenaa
End of podcast promotion
Qananiisaan fiigicha dorgommii olaanaa akkanaarra amma booda milkaa'uusaa, namoonni hedduun ija shakkiin ilaalaa turan.
Keessattuu dorgommii amma dura irratti hirmaachaa ture addaan kutuun isaafi umuriin isaas dabalaa dhufuun isaan, shakkiin namootaa akka guddatu taasisee ture.
Atileet Qananiisaa BBCtti waan dubbateen, inumaawuu qabxiin amma galmeesse kana akka jalqabbii haaraatti akka ilaaluu fi dorgommii ittaanuuf kan isa qopheessu tahuu dubbate.
Dabaluunis: "Qophiin kiyya yeroo gabaabaaf ture. Miidhameen ture, na dhukkube ture. Dhukkubbii sanarraa dandamadheetoo waldorgommii kanatti seenee... qabxii kana galmeessisuu kootiif, baay'ee itti gammadeen jira," jedhe.
Dorgommii Vaalensiyaa irratti atileetota ciccimootu irratti hirmaate kan jedhu Qananiisaan, "Keessattuu ji'a sadiin gadi shaakala taasisee," qabxii kana argachuusaatti guddoo gammaduu himeera.
Turtii waggoota sagalii oliin booda gara toora marsaa hawaasaa Facebook'tti kan deebiye Qananiisaan, dorgommii kana akka "jalqabbii haaraatti" akka ilaalu katabeera.
"Waldorgommii isa ittaanutti cimee qabxii kanaa ol fiduu akkan danda'u [kanan itti argedha]," jechuunis BBCtti hime.
Fiigichi ittaanu irratti dorgomuuf yaadeefi hojjechaa jiru kam akka tahe garuu hin dubbanne.
Dorgommiiwwan atileetiksii bara dhufu keessatti akkaan eegaman keessaa Olimpikiin Paariis 2024 isa ijoodha.
Tarii atileetiin gameessi kun qabxii barbaachisu argachuun, dorgommii kanarra ni hirmaata taanaan, dorgommii Olimpiikii isa afreessoo taha.
